सरकारको भर नपरौं आफ्नो ज्यानको सुरक्षा आफै गरौं

  दीपा आलेमगर  246 पटक हेरिएको

काठमाडौँ । यतिबेला नेपालीहरुको महान चाड घरघरमा भित्री सकेको छ भने अर्को तिर कोरोना भाइरसको संक्रमण पनि तिब्र गतिमा बढ्दैछ । जसले गर्दा मानिसहरुको ज्यान जोखिममा त छदैछ तर प्रायः गरिब विपन्न र असाय जनताहरु भोकभोकै बाँच्न बाध्य छन् । उनीहरुको जीवन कष्टकर बन्दैछ । जसका कारण यति बेला नेपालीहरुको महान चाड दशैं, तिहार, छठ लगायतका पर्व पीडादायी बन्दैछ । एकातिर आर्थिक मन्दीले मानिसहरुको मानसिक अवस्था कमजोर बनाउँदै छ भने अर्को तिर विश्वब्यापी कोरोना महामारीले मानिसलाई ठाडै चुनौति दिईरहेको छ ।

विश्वमा कोरोना भाइरसको संक्रमण यसरी तिब्र गतिमा बढेको छ कि जुन मानिसको बसमा छैन यो आलेख लेख्दासम्म विश्वमा कोभिड १९ संक्रमितको संख्या चार करोड २९ लाख लाघी सकेको जोन्स हप्किन्स विश्व विद्यालयले पछिल्लो अपडेट सार्वजनिक गरेको छ । यता हाम्रै छिमेकी देश भारतमा मात्र कोरोना भाइरसबाट संक्रमित हुनेको संख्या ७८ लाख ६५ हजार पुगेको छ । गएको २४ घण्टामा भारतमा ५० हजार नयाँ संक्रमित थपिएको स्वास्थ्य तथा परवार कल्याण मन्त्रालयले जनाएको छ । मन्त्रालयका अनुसार २४ घण्टाको अवधिमा कोरोना संक्रमितमध्ये ५ सय ७८ जनाको मृत्यु भएको छ । यो सहित भारतमा कोरोना संक्रमितमध्ये १ लाख १८ हजार ५ सय ३४ जनाको मृत्यु भएको छ ।

शनिबार ८ गते मात्र मात्र विश्व स्वास्थ्य संगठनद्वारा आगामी महिना कोभिडको समस्या थप बढ्ने चेतावनी दिदै विश्वभरका मानिसहरुलाई सुरक्षीत हुन समेत आह्वान गरेको छ । त्यसैगरी पछिल्लो पटक अमेरिका लगायत अन्य देशहरुमा कोरोना भाइरसबाट दैनिक संक्रमितहरुको संख्या अहिलेसम्मकै धेरै देखिएको छ । अर्को तिर विश्वमै आर्थिक मन्दीका कारण आम नागरीकको जीवन अब आउने दिनहरुमा कसरी अघि बढ्ला भन्ने चिन्ताले सताई रहेको छ ।

अमेरिकाको पछिल्लो पटकको कोरोना अपडेटलाई हेर्दा लकडाउन खुकुलो हुँदै गएको, चुनावी गतिविधिहरु बढेको र भिडभाड धेरै हुन थालेपछि संक्रमितहरुको संख्यामा वृद्धि भएको त्यहाँ स्थित अधिकारीहरुको भनाई छ । यो घटनाबाट पनि हाम्रा देशका नेतृत्वकर्ता र नागरिकहरुले समयमै सचेत भई आफूलाई सुरक्षित गरिएन भने आउने दिनमा कोरोना भाइरसले मानिसको ज्यान लिने पक्का छ । किन कि नेपालपनि पछिल्लो पटक कोरोना भाइरसको संक्रमण व्यक्ति हुँदै समुदाय र घरघरमा प्रवेश गरिसकेको वर्तमान अवस्था हो । तर पनि हामी रतिभर गम्भीर छैनौं । यस्तो जोखिमपूर्ण अवस्थामा पनि हामीले आफ्नो अमूल्य जिवनमा खेलवाल गरिरहेका छौं र गर्न बाध्य भएका पनि छौं । किन कि भोको पेटकोही पनि बाँच्न सक्दैन । तर यो विषयमा वर्तमान सरकार आजको दिनसम्म पनि संवेदशील हुनसकेको अवस्था छैन । हुँदा हुँदा स्यंम सरकारले कोरोना भाइरस लागेपछि उपचार गर्न नसक्ने अभिव्यक्ति जनतालाई दिइसकेको छ । जसले गर्दा यति बेला आम नागरीकहरु चौतर्फी मारमा परेका छन् । एकातिर गाँस,बास र कपासको चिन्ता त्यतिकै छ भने अर्को थियो पुस्तौपुस्तादेखि मनाउदै आएका सांस्कृतिक परम्परागत चाडपर्वलाई जोगाउनु छ भने अर्को तिर विश्वब्यापी कोरोना भाइरस लागेपछि उपचार खर्च कसरी जुटाउने र कसरी बाँच्ने भन्ने चिन्ता र पीरले आज आम नागरीकहरु चिन्तनमन्न गर्न बाध्य छन् ।

हिजोका दिनमा राम्रै हाँसिरहेका मानिसहरु दुईचारदिनपछि कोरोनाको संक्रमणमा परेर ज्यान गुमाई सकेको घटनाहरु हामीले आफ्नै आँखा अगाडि देखेका छौं तर पनि हामी सचेत भने हुन सकेका छैनौं आज पनि हामी नागरीकहरु खुल्मखुल्ला कोरोना भाइरसलाई चुनौति दिदैं भिडभाडमा रमाईरहेका छौं । जसले गर्दा जुन मानिसको एमिन्युटी पावर कमजोर छ त्यस्ता मानिसहरुलाई कोरोना भाइरसले सजिलै जिती शरीर भित्र प्रवेश गर्ने क्रम दिनदिनै जारी छ । कतिपयले कोरोना भाइरसलाई जित्न नसकेर अकालमा ज्यान गुमाउनु परेको घटनाहरु दिनदिनै बढी रहेका छन् ।

कोरोना भाइरसको उत्पन्न भएको झण्डै एक वर्षको अवधि हुन लागि सकेको छ । यो भाइरसले आज विश्वभरका मानिसहरुलाई कायल बनाई रहेको छ । तर पनि आजको दिनसम्म कोरोनाबाट बच्ने औषधि विश्वले बनाउन सकेका छैनन् । कति अच्चमको कुरो छ एउटा भाइरसलाई निर्मुल पार्न आज विश्वका ठूला ठूला सम्पन्न राष्ट्रहरु पनि हार खाई सकेका छन् । अर्को तिर आम नागरीकहरुको जीवन धरासायी हुँदै गईरहेको छ । मनोबल पनि कमजोर हुँदै गईरहेको छ । तर यो अवस्थामा भने कोरोनाकै नाममा भ्रष्टचारीहरु भने मोटाई रहेका छन् । कोरोनाको नाममा लाखौं करोडौं रकम भ्रष्टचारी माफियाहरुले भित्रभित्रै कुम्लाई रहेका छन् आखिरमा मर्ने भनेका जता बाट पनि सोझासाझा जनता नै हुन् । तर पनि हामी मौन हौं सरकारले गरेका गलत कार्यलाई खबरदारी गर्दैनौं । त्यसैले यो देशका भ्रष्टचारी माफियाहरुले राम्रै सँग डेरा जमाई सकेका छन् । तर एउटा गरिब निमुखा जनतालाई कोरोना भाईरस लागेपछि सरकारले सिधैं हात झिक्ने प्रयास गर्दैछ ।

नेपालमा यति बेला दशैं तिहारले सबै नेपालीहरुको मन तानिरहेको छ । तर मनमा अमनचयन छैन । आफ्ना घरपरिवार नातागोता र साथीभाईहरु सँग चाडपर्व मनाउने भनेर केही मानिसहरु आफ्ना गृह जिल्ला जाने क्रम जारी छ भने कोही मानिसहरु जति सक्दो सुरक्षित भएर जुन ठाउँमा आफू बसोबास गरेका छन् त्यही ठाउँमा बसेर चाडपर्व मनाउने साेंच गरिरहेका छन् । किन कि सबैलाई आफ्नो ज्यानको प्यारो हुन्छ । चाहे मानिस होस् या त जनावर नै किन नहोस् । कोरोना भाइरसले तिव्रता लिएपछि सरकारले पनि आ आफ्नो स्थानमा सुरक्षित भएर दशैं मनाउन आह्वान गरेको छ तर मानिसको मनै हो कहाँ मान्छ र यस्तो जोखिम घडिमा पनि मानिसहरु आफ्नो ज्यानको वेवास्ता गरेर आफ्ना जन्मघर तिर लागीरहेका छन् । किनकि वर्षमा एक पटक आफ्ना घरपरिवार आफन्ती मित्रजनहरुलाई भेट्ने र खुशी साट्ने चाहना र रहर सबैलाई हुन्छ तर समय विगतको जस्तो अहिले छैन । आज अलिकति पनि ख्याल गरिएन भने मानिसको ज्यान तलमाथि हुने पक्का छ । त्यसैले यो घडिमा आम मानिसले आफ्नो र आफ्नो परिवार समाजलाई कोरोना भाइरसबाट जोगाउन जति सक्दो दुरी कायम गर्न जरुरी छ । आफ्नो घरपरिवारको माया कसलाई लाग्दैन र तर समय परिस्थिति बुझेर अघि बढ्न सके सबैको हितकोलागि राम्रो हुनेछ । जिवन रहे यो साल दशैं आफ्नो घरपरिवारसँग मनाउन नपाएपनि आउने साल पक्कै पनि रमाइलो गरी आफ्ना परिवारसँग मनाउन पाइनेछ । त्यसैले समयलाई बुझेर आम मानिस सचेत भई धैर्यवान हुन आवश्यक छ ।

तर कोरोना घट्ने भन्दा पनि बढ्ने क्रम जारी छ लकडाउन खुकुलो पारेपछि कोरोना संक्रमित दिनदिनै बढ्ने र मानिसको मृत्यु हुने क्रम जारी छ । यस्तो अवस्थामा सरकारले जनताको गाँस,बास र कपासको व्यवस्थापन गर्नु पर्ने हो तर त्यता तिर ध्यान गएको देखिदैन झनै कोरोना भाइरस लागेमा जनता स्यंमले आफै उपचार गर्नुपर्ने भनेर विकुल फुकेको वर्तमान अवस्था हो । तर पछिल्लो पटक सरकारको यो विकुललाई जनताले कडा जवाफ दिएपछि ३ दिन अघि मात्र प्रधानमन्त्री केवि शर्मा वलीले जनतालाई जवाफ फर्काएका थिए । सरकार जनताको ज्यानको सुरक्षा र सेवामा छैन भन्ने कुरा स्पष्ट देखिन्छ त्यसैले जति सक्दो प्रत्येक मानिसले आ आफ्नो ज्यानको सुरक्षा आफै गर्नु पर्ने समय आएको छ

तपाईहरुलाई एउटा पुरानो नौआको कथा सुनाउन चाहान्छु जसबाट पनि मानिसको जीवन के हो र समय अनुसार चल्न सकेन भने कस्तो अवस्था भोग्नुपर्छ भन्ने कुरा यो कथाले सन्देश दिएको छ । कुनै ठाउँमा दुई जना दाजुभाईहरु थिए, जसमध्ये एकजनाको नाम नौआ थियो, जसलाई दैवीय आत्माले धारण गरेको थियो र उसले भगवान्बाट एउटा महत्वपूर्ण सन्देश प्राप्त गरयो । भगवान्ले–“भन्नुभयो अब छिटटै पृथ्वीमा ठूलो बाढी आउनेछ । अधिकांश मानिसहरु यस बाढीमा फस्ने छन् । त्यसैले सम्भव भएसम्म बढी मानिसहरुलाई बचाउ ।” त्यसपछि ती दाजुभाइहरुले ठूल्ठूला स्वरमा कराउँदै मानिसहरुलाई त्यस सन्देशका बारेमा जानकारी दिए तर तिनीहरुले भनेको सन्देशमा थोरै मात्र मानिसहरुले विश्वास गरे, आखिरमा ६ जनाले मात्र तिनीहरुको सुसमाचारमा विश्वास गरे । भगवान्ले तिनीहरुलाई एउटा ठूलो डुङ्गा बनाउन आदेश दिनुभयो । नौआको डुङ्गाको आकार गिङ्गोनट जस्तै थियो । कथा यस प्रकार छ । अब बाढी आउन थाल्यो, भयङ्गर हिंस्रक जनावरहरु र ठूला ठूला सर्पहरु पनि डाँडाको टुप्पासम्म चड्न पुगे तर डुङ्गा त्यस खतरालाई टार्न बनाइएको थियो । डुङ्गाको निर्माण कार्य पुरा भएपछि वर्षा भैरहेको हुनाले तिनीहरुले प्रतीक्षा गरी बसे । कसैले भने यो वर्षा ४० दिनसम्म रहयो, कसैले भने यो वर्षा १ सय दिनसम्म जारी रहयो । यसको अर्थ यो हो कि, वर्षा लामो समय अवधिसम्म जारी रह्यो । परिणाम स्वरुप, समुद्रको सतह झन् माथि–माथि उठ्न थाल्यो र त्यस डुङ्गामा भेला भएका मानिसहरु मात्र बाँच्न सफल भए । सामान्य डुङ्गाहरुका र डाँडाको टुप्पासम्म चड्न पुगेका मानिसहरु सबै टुप्पामा पुगेका हिंस्रह जनावरहरु र सर्पहरुद्वारा सबै खाइएका र मारिएका थिए । अन्तिममा ८ जना मानिस मात्र बाँचेका थिए । जसले भगवानको सन्देशलाई आत्मासाथ गरेर व्यवहारमा लागु गरेका थिए उनीहरु बाँच्न सफल भए । किनकि मानव नै भगवानको प्रतिनिधि हो ।

त्यसैले प्रत्येक मानिसले यो बेला गम्भीर हुनैपर्छ यदि यो समयमा आफ्नो मुढेबल प्रयोग गरेर मलाई केही पनि हुँदैन भनेर भिडभाडमा जाने गरयो भने पक्कै पनि कोरोना भाइरसले उसलाई छाड्दैन किनकि कोरोना आफै घरमा आउने होइन जब हामी भिडभाडमा जान्छौं दुरी कायम गर्न कन्जुसाई गर्छौ भने कोरोना भाइरस हाम्रो साथमा हामीसँगै आउने हो । त्यसकारण कोरोना भाइरसलाई कमजोर नठानौं किनकि आजसम्म पनि विश्वले कोरोना निर्मूल पार्ने औषधी बनाउन सकेको अवस्था छैन । त्यसैले पहिलो कुरो हामी सुरक्षित साथ बाँच्नु परयो अनि हाम्रा आफन्ती साथीभाई इन्टमित्र, चाडपर्व सबै सबै हाम्रो साथमा रहन सक्छ । हामी छैनौ त केही छैन त्यसैले यो बेला प्रत्येक मानिसले आफू पनि सुरक्षित हौं र अरुलाई पनि सुरक्षित बनाउँदै हौसला र प्रेरणा दिएर अघि बढ्यौ । जहाँ छौं त्यही बसेर सुरक्षित ढंगले चाडपर्व मनाउने गरौं । अतः विजया दशमीको (दशैं)को शुभअवसरमा देश विदेशमा रहनु हुने सम्पूर्ण परिवारजन, आफन्तजन, मित्रजन, दाजुभाई, दिदीबहिनी र सबै शुभचिन्तकहरुलाई हार्दिक मंगलमय शुभकामना व्यक्त गर्न चाहान्छु । सबैलाई नवदुर्गा माताले रक्षा गरुन् ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

सम्बन्धित समाचार