रोजगारी सिर्जनामा अपेक्षित सफलता हासिल गर्नुपर्छ – राष्ट्रपति

काठमाडौं, २४ पुष । राष्ट्रपति विद्यादेवी भण्डारीले उद्यमशीलताको विकास र रोजगारी सिर्जनामा अपेक्षित सफलता हासिल गर्न बैंकिङ तथा वित्तिय संस्थाहरुले सरकारसँगको समन्वयमा व्यवहारिक योजनाहरु बनाइ लागू गर्ने पर्ने खाँचो रहेको बताएकी छिन् ।

आइतबार राष्ट्रपति कार्यालयमा भएको बैंक तथा वित्तिय संस्था परिसंघ नेपालको तेस्रो वार्षिक साधारण सभालाई सम्बोधन गर्दै उनले पुँजीको निर्माण र परिचालनका क्षेत्रमा सरकारका उद्देश्यहरु उपयुक्त हुँदा हुँदै पनि उद्यमशीलताको विकास र रोजगारी सिर्जनामा अपेक्षित सफलता हासिल गनै अझै धेरै कामहरु गर्नुपर्नेमा जोड दिइन् ।

राष्ट्रपति भण्डारीले बैंक तथा वित्तिय संस्था परिसंघले आर्थिक क्षेत्रका जल्दाबल्दा विषयहरुमा विश्वविद्यालयहरु, प्राज्ञिक व्यक्तित्व तथा विज्ञहरुद्वारा अध्ययन अनुसन्धान गरी निजीगत सुधारका लागि सम्बन्धित निकायहरुलाई अभिप्रेरित गर्नु राम्रो भएको बताए । उनले आर्थिक क्षेत्रमा आवश्यक पर्ने दक्ष मानव संशाधन स्वदेशमा नै उत्पादन गरी स्वदेशकै सेवामा लगाउनका लागि सहकार्य आवश्यक रहेको पनि बताइन ।

उनले नवप्रवद्र्धन र उद्यमशीलताका लागि युवा पुस्तालाई अभिप्रेरित गर्न परिसंघको ठूलो नैतिक एवं भौतिक कामको अपेक्षा मुलुकले गरेको पनि बताइन् । उनले आन्तरिक उत्पादन बढाउन र उद्यमशीलता प्रवद्र्धन गर्नसके आयातमा आधारित उपभोगप्रणाली यसमा आधारित राजश्व प्रणालीमा सुधार ल्याउन सकिने बताइन् । राष्ट्रपति भण्डारीले आर्थिक समृद्धिका लागि मुलुकमा आवश्यक पर्ने सबल मानव संशाधनको विकासमा मद्दत पुर्‍याउने हेतुले शिक्षा तथा स्वास्थ्यका क्षेत्रमा राज्यको परिपुरकको रुपमा परिसंघले थप योगदान दिनेमा आफू विश्वस्त रहेको बताइन् ।

राष्ट्रपति भण्डारीले अन्तर्राष्ट्रिय संघ संस्थाहरुसँग सम्बन्ध बिस्तार गरी पुँजीको परिचालन गर्नु आजको आवश्यक्ता भएको बताइन् ।

यो खबर पढेर तपाईलाई कस्तो महसुस भयो ?

तपाईको प्रतिक्रिया

सम्बन्धित समाचार